İran hökuməti sentyabrın 24-də ölkədə matəm elan edib.

Bizimyol.info Publika.az-a istinadən xəbər verir ki, sentyabrın 22-də Ahvaz şəhərində keçirilən hərbi parad zamanı terror aktı törədilməsi nəticəsində 28 nəfər həlak olub.

"İran İslam Respublikasının rəhbərliyi terror hadisəsində ölənlərin yaxınlarına başsağlığı verir. Onların dəfn gününü matəm günü elan edir", - deyə mətndə deyilir.

Eyni zamanda İran hökuməti qonşu dövlətləri terrorla mübarizədə təhlükəsizlik tədbirlərini gücləndirməyə çağırıb.

Qeyd edək ki, sentyabrın 22-də “Müqəddəs müdafiə” həftəsinin birinci günü başlayıb. Bu münasibətlə İran İnqilab Keşikçiləri Qvardiyası və Ordu Tehran da daxil olmaqla İranın bütün şəhərlərində hərbi parad keçirir. Ölkə paytaxtında keçirilən tədbirdə İslam Respublikasının prezidenti Həsən Ruhani və parlamentin sədri Əli Laricani iştirak edib.

Tədbirə körfəzdən və Bəndərabbas limanından 600 döyüş gəmisi də qatılıb.